Ruzai Saibinnim amche pasot mag
Novembracho mhoinno amkam navelkarank ek kherit khuxalkaiecho karonn amchi askarinn Ruzai Saibinnichi porob vhodda dobajean ami somorombhtanv. Ondhum hi porob Novembrache 19ver aila. Vhoddlem pursanv korun, novena, magnnim, dhormik gayana gavun hi porob nettan kortanv anik hangach thambtavn ani soglem kabar, punn porbhecho ugdas koso amchea otmik jivitant kitem tori Saibin Maiechem jivit ami apnnaitanv kai? Ho vichar chodd ghorjecho. Amchi porob ghonghonan zali soglim khuxi, Marieche jivitachem kitem tori xikunk ani jieunk zai tednam amkam porbhecho faido.
Marieche don gunnacher nodor ghalun niallunk maka borem dista.
Poilo ghunn: Marieche aiteponn vo dusreank hajirponn (availability).
Dusro ghunn: Maginastanam Maria dusreanchi seva chakri korta (helping others without being asked).
Poilo ghunn- Marieche hajirponn (availability). Sorginchea bapachi khuxi aplea putak monis rupan ani soimbhan sonvsarant dhaddchi ani munxakullachi sodvonn korchi. Tachi nodor Mariecher poddli ani aplea bhodvea Gabrielak dhaddun ticho hoikar gheuncho, bhoddvo Mariek Devachi yevzonn ugti korta ticho hoikar gheunk, Mariecho zobab zalo “Hoi! Hi asa hanv (Here I am).” Ti Deva Bapache yevjonnek raji zali ani tednach Devacho put tichea nirmoll kusveant zolm gheta (Her availability to God). Bhoddvo tika hemvui sangta Elizabeth zanntte pirayer ghorbhest asa Maria fattim – fuddem chintinastannam dhavim dhavim tika mellunk veta ani aplea hazirponan tika sangat dita. Logna vosreant vokhol- novreak borabor ti hajir asa ani aplea hajirponan tankam khuxal korta. Jezuchea khursa mollim Maria hajir asa ani taka koxtant sangat dita. Hem asa Mariechem hajirponn.
Dusro ghunn – Maginastanam dusreank adhar dita. Bhaghevont Jacob aple chittint oxem boroita “korneo na zalear bhavart melolo zata.” Bhavart ani doiall borabor vetat. Mother Teresa oxem mhunta Mog boreo korneo korunk adhar ani korneo mhunllear ghorjevontachi seva chakri. Maria Elizabethik bhett dita ani tichi goroz polleta ani magnastanam tin mhoine tichi seva chakri korta. Logna vosreant tankam soro unnem asa mhonn Maria polleta ani maginastanam aplea puta vorvim tanchi goroz purn korta, tankam adhar dita. Jezu koxttovta aplea khandar khuris vorta anik khursar umkolta, Maria aplo sangat diun tachea khoxttant vantto gheta ani Taka buzvonn dita, hem soglem Maria maginastanam korta.
He porbhecho ugddass koxo ami kitem korum-ia? Mariecher nodor ghal ani tujem hajirponn ani vhell dusreank di (be available to others with your presence) hem ami koxem jietoleanv ? Amcheach ghorant korum-ia: Ghov- bhail eka mekak vell ditat, vait bhoriant sangat kortat eka mekak sozmotat, duens -piddent ani vaitant sangat kortat anik apli seva chakri ditat. Bhurgienk vell ditat, tanche borabor bosun ani ulovun tankam borim totvam xikoitat, chukta tedna tankam mogan xidkaitat. Amchea gharant aslolea zanteank bore utor diun tanchea borabor vell sarun tanchi seva chakri korun ami Saibin Maiechi dekhin choltanv.
Tumkam sogleank Padri Vigarachea ani Padri kuranchea ani mojea nanvan tumkam soglleank ek khuxalbhorit ani Saibin Maiechea besanvanim bhorloli porob anvdetanv.
Happy Feast to you all.