PASKANCHI POROB
Amchea dolleam mhukar don paskam dovorun ho nihall ami korum-ia. Poili paskanchi porob ani dusri ratchea kallokant somorombhtanv ani uzvall petoitanv ti porob. Karonn paskam mhunllear patki kallok nopoit korunk Deva jivit ani uzvadak survath ditanv. Hi rat amkam don paskancho ugdas korta.
1. Judevanchem pask: Judevanchea gulamponnachea suttkeche pask, suttkechea pustokant amkam Judevanche suttkechi kobor sangta (Sut. 12, 1-14). Israel porza Egyptant gulam asli ani sosunk zaina toslem pidda-pidd bhogtali. He porishtitint aple dukh Deva fuddem galun ti roddtali ani sonstali. Dev tanchem roddnem aikota: Havem mhojea porjechem roddnem aikolam ani tankam sodovunk hanv devun ailam Dev Moisesak sangta mhojea nanvan tu Egyptant voch ani mhojea porjek suttka di Hanv tujea barabor astolom bhievunaka.
Eka mendriachea rogtan Dev tankam suttka dita ani mendriache rogot darant lavun tanchea malgodea putancho jiv saballta ani Egyptanchea putank marunk tankam suttoita ani tamdea doriantlean par korun tankam gulamponachi suttka dita. Hem pask Devan Israel porzek dilli bhasavni Dev sodanch visvaxi Dev tankam fokot bhaili suttka dita ani tankam ek porza koxi ek somudai ghodta ani Aplea ekvottant hadta Dev mhunta Hanv zatolo tumcho Dev ani tumi zatolim mhoji vinchun kadloli porza. Hi Izrael porjechi suttka ek kunna Jezu vorvim yevchi asli ti paskanchi porob.
2. Novem pask – Jezu Krist paskancho mendro: Apunn koxtt moron sonsunk veche adim Jezu xisam barabor pask porob somorobhta Judevachi chali pormonnem. Te jevonnar undo ani dakam soro ghevun apli kuddi ani rogtant bodolta. Jezu sangunk sodta ki rogot varovun ani khursar morun munxachi sodvonn korta ani aplea jivitachi Bapak bhettovni korta ani apunuch paskancho mendro zata. Adlem pask somplem, novem pask suru zalem.
Hea novea paskant monzatichem rogot na punn Jezu kristuch Devacho mendro zavun aplea rogtan munxachi sodvonn korta. Egyptant mendria monzatichem rogot Israel porjek suttka dita zalear, Jezu aplench rogot varovun akhea muxea kulak patkanchea gulamponantli suttka dita. Munxank sorginchi daram ugodda Jezuchem moron ek har (defeat) nhoi punn zoit (victory) karonn mornacher zoit vorun Jezu punorjivont zata. Jezucho fond kali, mornachean taka fondant dovorunk zalo na. Novem pask sunpurn zalem. Mornachea kallokantli suttun Jivitachea uzvadant pavlim.
3. Jezu barabor ami-i punorjivont zallim monxam, Devachi apurbaiechi burgim. Batismachea somorobhant ami Jezu barabor patkak mleanv ani Tachea barabor punorjivont zaleanv. Ami atam adlim munxam nhoi, punn Devachea kurpen borlolim novi munxam. Atam ami niraxiponan jie nanv punn bhorvonxean bhorlolim munxam. Novea jivitachi munxam.
4. Apovnem kurpeche jivit jieunk paskanche rati petleli vat hatant gheun ami uzvadachi mhunn govai ditanv. Batismant paskanche vaticho uzvad amkam dilo anik uzvodachi monxam zavunk amkam amontron kelem ani ho uzvad jivit bhor petlolo samballunk amkam ulo marlolo. Jezu barabor patkak morum-ia ani Jezu bhaxen Devache kurpen borlolem uzvadachem jivit ami jieum-ia.
Tumkam sogleank Padr. Vigarchea nanvan, padr. Kuranchea nanvan ani mhoje nanvan kuxalbhorit paskanchi porob anvdetanv.