MHOJEM SOVEM RIGUN RAVAT
Niktench gonvllik novem voros ami suru kelam. Hea vorsak zaitea padrichem adol-bodli zalea. Amcho padr kur Fr. William amche firgojent thaun Arambolche firgojent bodli zaun thoim gela ani aplo gonvllik vaur suru kela. Amche Navelche firgojent tannem zaito boro vaur kela tea pasot taka ami dhinvastanv. Aplo boro vaur fuddem vorunk Devan taka bori bolaiki divchi.
Toxench amche firgojent amkai dog nove padri favo zaleat ani te amche modem asat. Pri. Pascoal Afonso hannem zaitim vorsam hanga Navelche firgojent padr kur koso vaur kela ani adli zaitim zannam taka vollkhotat. Dusro mhonnlear novich padriponnachi makhnni ghevun ani tornne piraiecho Fr. Elidio Noronha ganvan Salvador de Mundo. To dogam bhoinnam uprant atth vorsamni zolmolo ekloch put. Devachea apovnneank kan diun to siminarint bhitor sorlo ani aiz padri zaunk Ruzai saibinniche firgojent poilech pautt aila. Tacho gonvllik vaur boro ani folladik zaunk, Devachem utor bore toren tannem porgottunk taka ami ies magtanv ani amcho hunhunit yeukar ditanv.
Dor novea gonvllik vorsa amcho bisp amkam ek vixoi dita. Purai voros tacher niall korunk ani amchem jivit odik kurpechem ani otmik vatten jivall zaunche khatir. Hea vorsa amkam vixoi dila to ho “Mhojem sovem rigun ravat.” (John 15:4). Hea sondorbant Jezu amkam oxem mhonta “hanv dakvel ani tumi mhoje fantte”. Dakvelik tumi chikttun ravlea xivai tumcheanim apxinch follam diunk zaina, ani follam dina to fantto katrun bair udoitat ani kityakuch upkarona dekhun Jezuk chikttun ravlea xivai amcheanim follam diunk zaina.
Jezuk rigun ravop hacho orth kitem? Tem ami matxe iskuttavun niallum-ia. Eka zhaddache fantte zhaddak lagun asunk zai ani toxench jive-i asunk goroz. Karonn zhaddak lagun asa zalear pasun, suklolo
aslear tea fantteak follam zainat. Follam fokot zhaddak lagun asa ani jivo asa zalearuch, borim follam melltat. Dor ek Kristi bhavarti Jezunt rigun asta tednam borim follam dita. Rochnnaracho hetu, Deva sovem amcho kholaicho sombond rakhun dhovrunk ani kennai matxe bauta zalear ami portun sombond bandun haddunk, novem jivit gheunk ani jivall zaunk gorjechem. Devachi yevzonn ami Tache sovem kholayan sombond portun sodun kaddunk amkam vinoti korta. Amkam sasnnik jivit ani bhorvanso ditolea ekleach Jezuchea thir sombondan jieunk amkam ek avhan.
Devachem utor dor eka eka kallar amkam bhavarteank ekttaita, akarta, sudhraitani posta. Povitr Pustokant sorgincho bap Tachea burgeank vodda mogan bhett’ta anik ek mogall bapui koso amche thaim to uloita. Rigun ravop mhonllear ek bailo vo voilea voir sombond nhoim punn ek khol sombond khunnaita. Krista sovem rigun ravop mhonllear taka amchi Jivitachi zhor mhonn vollkhun ghevop ani soglle porstithinim taka visvaxi ravop, dekhun onduchea vixoi-acho boro foll kaddum-ia ami Devachea utrantlean odik Jezuchi ollokh ghevum-ia.